يا ريت باقي شْوَي (شعر د. جميل الدويهي)

يا ريت باقي شْوَي (شعر د. جميل الدويهي)

لـْعندي مــا عادتْ تِجي، ولا تلفنِتْ مَـرّه

وتَركتْ بعمري الحزين سْنين مصْفرّه...

وعا طُول فيها حلمتْ ومْشيتْ فوق الميّ

تا ضــــمّ جسما اللي شفتو أمس متْعرّى

وشْفافها اللي كنتْ إدْعي لهُن بالـــحـَــيّ

انطبعو عا تمّي تا صار حقول مزْهرّه...

وسِلسال فضّه عا صــدرا قال كلمة خيّ

بْيطْلع عا بالــو الصِّـدي لولا بـِقي بَـرّا...

والشَّعْر كلما انفلش بيردّ مَيّت حـــــــــيّ

تْربَّى عا إيدي وعـا إيدي كان يتْدرّى...

وخصْر اللي بين البشر مـــا بيلتقالو خَيّ

تْطلّعتْ صـــــوبـــو بنظرة عين محمرّه

وشدّيت حَولو تا قالت مـــن وجَعْها: "أيّ

تْوقَّى يــا عاشق صبي لا تكْسر الجرّه!"

قــدَّيش ضِعنـــا سوا بين الشمس والفيّ...

طِرْنا عـا خَيل الوقت، وتفرفطتْ غرّه...

مــن عطر خدّا النقي يا ريت بـاقي شوَي

تــــا فكّ سِرّو الغريب، وإختـــِـــرع ذرّه

لكنْ وحيد، وبيقولو النــــاس عنِّي: خْطـَيْ

متل الحديـــــــد العتيق الما إلــــو شَرّا...

لا إمّ حنِّت عا جرحي، ولا نـَصحْني بــَيّ

كلما التقيت بحياتي، بشوفها مُـــــــــرّه...

الكانت عليِّي كريمِه متل حاتــم طــــــــيّ

صـارت بخيلِه، وما فيِّي شوفها من بعيد

وعا نهار وجّا الحلو مــــا عدتْ إتمرَّى.