Farah News Online

  http://www.farah.net.au/


كلود ناصيف حرب: اسمي صَلا عا شفافك

| 08.08,18. 03:16 PM |




اسمي صَلا عا شفافك


كلود ناصيف حرب


أنا والقمر وإنت قبالي.


والغيمة عالمفرق هربانه من الريح.


وعيونك بيحاكوني.


وقلبك بيرافقني وبيقول:


"إنتي حياتي


وذكرياتي...


إنتي نبض الحروف


وجنينة الأمل".


***


شو بخاف اسألك عن حبّك...


يمكن ينجرحو الكلمات...


يمكن يهربو مع الوقت...


ويضيعو بغابة النسيان


خليك ساكت وعم تتطلع فيّي.


انا البحر بقلبك.


النغمه عا شفافك.


انا ضحكتك وغضبك.


انا طفولتك ورجولتك.


وعنوانك بين رموش عيوني.


قبلك ما عرفت كيف بيكون الحب.


وبسّ حبّيتك صارت دمعتي قصيدة.


صار عمري حنين.


وصارت حروفي من عطر الياسمين...


***


تركت اسمي وعنواني


ورحت لعندك تا اتلاقى بحالي


واعرف انو اسمي هوي صلا عا شفافك...


وكل ورده بتدبل بالخريف


الا وردة حبي الك.


حبي الك هوي كل الفصول.


هوي اللي فوق المعقول...


كل الزمان والمكان إنت.


وكل البدايات اللي ما في لها نهاية.


وهيك بحبَّك.


Farah News