Farah News Online

  http://www.farah.net.au/


الأديب والشاعر المهجري د.جميل الدويهي ينعي شقيقته عفيفة فهد التي توفيت صباح اليوم في لبنان

| 24.01,18. 05:52 PM |





الأديب والشاعر المهجري د.جميل الدويهي ينعي شقيقته عفيفة فهد التي توفيت صباح اليوم في لبنان


المرحومة عفيفة الدويهي فهد



إن الموت اصعب ما نواجهه فنحن لا نتخيل الحياة بدون أحبائنا وبنفس الوقت إن الموت علين واجب.

إستيقظ الاخ والصديق د.جميل ميلاد الدويهي في صباح اليوم على صدى خبر فاجع حزين وقاسي عليه وعلينا حيث توفيت في لبنان شقيقته عفيفة الدويهي فهد، لينعيها الى الجالية ويرثيها بكلمات تدمع لها العين وقصيدة مؤثرة..


الأديب والشاعر المهجري د.جميل ميلاد الدويهي


يا إختي الغالية، الموعد غريب، والإيام غريبه، ومن ضحكتك رح يبقى الصوت والصدى، والعتمه ما بتمحي نورك من عيوني. "يقبرني قلبـَك" ما تقوليها. وكم مرة قلتلّك ما تقوليها؟ قلبي ما بيقبرِك يا أختي يا حبيبة روحي اللي ربيت عا إيديّي. قلبي بيت خلود لإلك. ومستحيل تغادري قلبي حتى آخر لحظة من حياتي. عزّتني الدني يا إختي، وانكسر جانحي، وما قدرت شوفِك قبل ما تروحي... من غير سبب رحتي. من غير وداع... كنت واعد نفسي لاقيك بآخر عالسنة عا ميدان إهدن ونفرح سوا، ونرجع نضحك ونضحك متل الحور بالربيع... بس القدر أخد أحلى صباح من عيوني، وخطف ملاك حارس لإيامي. وهلق أنا وحدي بغيابك... الجرح أنا... والوجع أنا... وصرختي كبيرة من بعدك، متل الإيام، وما رح تنتهي إلا وقت ما إلتقي فيكي من جديد، وتضحكيلي عند الباب... يا أحلى وأغلى أميرة:

_________________________


هيك الدني، منموت نحنا وواقفين

يا حامل التابوت، بحلفلك يمين

ما قدرت إغفا بعد ما غاب الحلو

وما قدرتْ قلّو كيف جرّحني الحنين...


موعود شوفو كنت آخِر هالسنِه

وما عرفت بَدّو يروح عا تاني دِني

ما بيغْلطو الإيّام مرّه بالحساب

والكاس داير عالفقير وعالغني...


البْيوت هِربو، وما بقا نقشع حدا

وما عاد زهر اللوز فتّح عالهدا

وعصفور كانو جوانحو متل الربيع

صوتو وقع عالأرض، وانبحَ الصدى...


حالف ما بدّو يرجع... وشو معجّلو؟

البواب زعْلو... والشجر عم يسْألو:

معقول نطفي الشمع ويضيع الطريق...

وعيون سُود كبار ما يتكحّلو؟


إنتي ملاكي... وليش ما بقيتي معي

مْن بعيد بصرخ صرختي وما بتسمعي

تركتي جميل، وما بقا العالم جميل

ورح ضلّ إنطر عالبحر تا ترجعي...


كل البـِقي من بَعد منّك ذكريات

كومِة صُور عالارض ما فيها حياة...

يا رَيت فيّي الرُّوح إعْطيها لِكِي

وإلا لِكي ما بْحبّ إعمل معجزات...


لا تسكّري الإيّام عا حْكاياتنا

وودي سلامي لأهلنا ورفقاتنا

وقولي لهن رح نلتقي بعد الغْياب

وهونيك بدهُن يرجَعو ضحكاتنا.


ببالغ الحزن والأسي تتقدم ادارة  "موقع فرح نيوز" وآل الدهيبي  بصادق العزاء والمواساة الى الاخ والصديق د.جميل ميلاد الدويهي والى عموم آل الدويهي وفهد في الوطن والمهجر في وفاة الفقيدة فيفي، سائلين المولى عز وجل أن يتغمدها بواسع رحمته ومغفرته وأن يسكنه فسيح جناته. و (إنا لله وإنا إليه راجعون)

Farah News