الشاعر المهجري د.جميل ميلاد الدويهي: "بكرا السنونو بيرْحلو"

| 15.11,17. 04:38 PM |

 




يقول الشاعر والاديب المهجري د.جميل ميلاد الدويهي: آخر قصائدي "بكرا السنونو بيرْحلو" من العمود الشعري السابع "المدوّر العامي"، والأجمل في هذه المجموعة. هذه القصيدة مميزة عندي في كل شيء، واستغرقت وقتاً طويلا لكتابتها، لأنها تختصر أكواناً لا توصف بكلمات:


بكرا السنونو بيرْحلو. قولِك بعد رح يبعتو لعندي خبر، قولك بعد رح يرجعو عا بيوت غير بيوت، عا غابات فيها بكْيتْ وراق الشجر. والحُبّ كذبه مفصّله عا قياسنا، الخيّاط لبّسنا وتركنا عالطريق ملبّكين. عندي حنين، ومين قادر يسمع الصوت الحزين؟ من وقت ما رحْتي عا غفلِه اصفرّ بُرج الياسمين... والحبّ هُوّي غياب، هوّي صورة اللي بتنمحى من كتاب... هوّي حكاية الفيها أسامي تجرّحو... وجرحي أنا من وقت ما شِفْتو معي، ما قدرت غَيّر مطْرحو.


رح ضّل وحدي ساكن بها الريح. عنواني جَزيرة غيم، وتيابي السهَر. حبّيت إنّو مرايتي تكوني... حديقه مْزهّره... ومتل الكأنّو خْواتْ حبّيتِك، كأنّو حلم ما تفسّر... كأنّو ضحْكتي وقت اللي كنت زغير... إنتي لأ... مش إنتي، عا بالي سافر وما عود حاكيكي، لأنّك من وَجع... قولِك حدا بيِمْحي خَيالك من عيوني... شي سحْر بيشيل منّي الذاكره وما عُود أعرف مِين إنتي، ولا أنا... ولا عُود طُول الليل طيفِك إلمَحو... وهيدا العذاب اللي إلُو سنتين شِيلو من ضْلوعي... وإشْلحو.


عم عِدّ إيّام الزعَل، وضجرتْ، هيدا الحَيط ما بيساع إيّامي، وحِبْر تا ضَلّ إكتب ما بِقي بالمَحبَره. وعندي سؤال زْغِير: كيف بتقْدري تمْشي طريق مْسكّره؟ ... وعم تكْبري وإكْبر أنا، وتيابنا من كتر ما قطعنا مسافِه مغبّره... قدّيش قلت: بْودّعك وبْروح... يمكن هيك ينساني التعبْ... وهْجرتْ ذاتي، وقلت: "ما حبّيتها ولا إسمْها عا صفحة كتابي انكتَب... كلّ القصص محّيتها بلحظة غضب”...لكن أنا من بعد مدّه برْجع لْعِندك متل عصفور ضايع بالشتي... تا شمّ عطر زْرارِك اللي تفتّحو... ومن دون ما كتّر حَكي، عيوني لِكي السرّ الغَميق بيشْرحو.


مش همّ أيّا يوم حبّيتِك... وقت ما غاب عن بابي القمَر، وقت الشمس لبستْ عبايه من حَرير مْدهّبِه. وقت اللي غنّى السهل، وانبحّ الوتَر... ما عْرفتْ أيّا نهار؟ وين وكِيف؟ ما بيعْني إلي كتير السؤال ولا الجوابْ...
إنتي حقيقه بحبّها، ومفتاح بيتِك ما حَدا بيوصل إلو غيري أنا... ولا في حدا من الناس بابك يفتحو... ولولا السنونو بيرحلو، عندي صور حلوين، كلما شفتهُن بِفرَح أنا... وبْيِفْرحو.



(Votes: 0)

Other News

الشاعر محمد وهبه: ذكاء النسيم شاعر الوطن يهدي كل مواطن إماراتي ديوان "مشاعر وطن 71" الشاعر محمد وهبي: رسالتي الأخيرة الشعر جميل الدويهي: كلما سألتْ عن إسم الشاعر حاتم جوعيه: لَحْنُ الفِدَاء الشاعر محمد وهبي:تسكن العيون الشاعر حاتم جوعيه: لكِ أكتبُ أحلى الأشعار - قصيدة الزمن للشاعر سيمون إبراهيم الشاعر المهجري جميل الدويهي:هربان منها الشاعر محمد وهبه: كوكتيل الشاعر حاتم جوعيه: قصيدة رثائيَّة في الذكرى السنويَّة على وفاة الشاعر والأديب الكبير المرحوم الدكتور جمال قعوار الشاعرة فلورا قازان: خَمرُ الشِفَاه الشاعرة عناية زغيب: وجع الغياب الشاعر المهجري جميل ميلاد الدويهي: زعلْتي أكيدْ الشاعِر جميل نقولا الحايك : "دموع ما نشافو" عباس علي مراد: خيول اللهفة الجامحة محمد وهبه:نسيج القلوب الشاعر المهجري د.جميل ميلاد الدويهي: العطرُ من أقلام حِبري موكبُ الشاعر جميل نقولا الحايك: فرَح الإبِن بعيد الإم الشاعر محمد وهبه: في عتمة الليل الشاعر المهجري د.جميل ميلاد الدويهي: "عصفور بالغصن العَبي" قصيدة شكِر الى الزميل والشاعِر الكبير الأستاذ عادِل خَداج المحترَم بقلم الشاعِر جميل نقولا الحايك الشاعر المهجري جميل ميلاد الدويهي: برْكي هوا بيردّني الشاعر جميل نقولا الحايك:"عيد الشهداء استراليا" الشاعر جميل نقولا الحايك: "عيد الفصِح" محمد وهبي: في منتصف الليل الشاعِر جميل نقولا الحايك: بمناسبة زيارة معالي وزير الخارجية المهندس جبران باسيل المحترَم الشاعر جميل نقولا الحايك: "فتحولي وجربوني" الشاعر جميل نقولا الحايك: "مديونكُم مديون" محمد وهبي:لقاء عن بعد