Farah News Online

  http://www.farah.net.au/


قصيدة الزمن للشاعر سيمون إبراهيم

| 14.09,17. 12:28 AM |



الزمن

الشاعر سيمون إبراهيم



كرمال، عينك يا زمن باقي

واقف بوجّك... ت العمر، يوقاف

فتّش ع غيري، عَ حدا بيخاف...

تفضّل ت نتحاسب، ... أنا حاضر

وقت ل بدّك ... بكشف وراقي...

وراقي، كتبتا، من دمع، مش حبر...

وعَ كلّ كلمة،... في فكر مسؤول

... فكر واضح ... بالصدق مجبول...

...معجون بالتجديد، بالموهبة مشغول...

وعَ كلّ، ورقة...

التجربة، بتقول

... شقّ الرتابة، وفوت للإبداع

وبعد ما تشوف الحقيقة... رجاع

كتبها عَ صفحة مخصّصة... للشعر...

وراق من... هالشكل

...إلهن سعر

وما فيك تلغي... وراق من هالشكل.

... وراقي، مَسَحتن، موهبي وإحساس

زرعتن قوافي... فرّخو قصّة

... قصّة قلق، في خلفها شاعر

هيدا القلق... عم يطلب الأعمق

وكلّ صفحة... في قلب يشهق

وعَ شهقتو، في فكر... يتعملق

وبين فكر يتعملق ... ويشهق قلب...

تحرَّك إله الشعر... وتلبَّك

وسّع المطرح، ... زيّنو بالنور

وبارك بإيدو... شعر عم يخلق...

ما فيك، تلغي يا زمن...

كلمة...

نكتبت، بنور الفكر قبل الحبر..!!!

خَرقِت الليل... وخزقِت الظلمة

ودقّت على باب الحقيقة... عِبر

... إيد وصّلها الألم للشعر...

والشعر... وصّلها على الورقة

هيك خلَقِت... قصّة وراقي

نكتبت، بأشواقي وبأعماقي...

وراق من هالشكل

... صارو غُمر

إيدن، بإيدك... يا زمن للعمر

وما فيك تلغي وراق...

... من هالشكل.,.

بيجوز، شباك الوعي ينشقّ

... ويفوت من شمس الحقيقة... خيوط

... يتجسّدو بالحبر... فوق وراق...

ويتغزّلو، بالحبّ والأشواق

... ويتعتقّو بالفكر... والأعماق

...وت يلوّنو بالشمس، كلّ الدهر

وراق من هالشكل... لونن سحر

إيدن بإيدك... يا زمن للعمر

وما فيك تلغي وراق... من هالشكل

Farah News