Farah News Online

  http://www.farah.net.au/


الشاعر جميل نقولا الحايك: "مديونكُم مديون"

| 24.02,17. 11:36 PM |






بقلم الشاعرجميل نقولا الحايك

"مديونكُم مديون"


الكُم عَليي  وصِفي  مديونكُم  مديون

ومن بعِد  شردِة  سَفر بدي  تعذروني

مارق عليي الوقِت مرقِة  شبَح مجنون

خلًى ساعات  الفرَح  ساعات محزوني


ما بريد يبقى حَدَا من بو جورج مغبون

وحتى الأذتني  ما برضى  تنام  مغبوني

ربي  عطاني  قلِب   با لعاطفي  معجون

ويا ما و يا ما  سامحِت  اللي  استفزوني


قضيت عمري بحزِن واقف مع المحزون

وبقلِب    حياتي    فرَح   لما    بيطلبوني

وساعة  شرودي  بتجي تا فجِّر  المخزون

وخلي   بنات   الشعِر   يتقاسمو    الموني


ويا ما ويا ما  ضحِكلي  الورِد  عالطربون

ويا ما ويا ما   عليكي    الناس   حسدوني

عايش حياتي  الهدَف  مطرَح  ما كنتي كون

وخلي  ليالي   الزجَل    با لغزَل    مفتوني


ومهما  يطول  السهَر  ما  بينطبقلي   عيون

تا الجَمِر   يشلَح    قميصو   فوق    كانوني

ممنون  طول  السهَر  والنوم   مُش   ممنون

حتى انجبرني   النعَس   لملِم   عذابي   ونام

تكوني   بعيوني   و عليكي   غمِّض عيوني


"خواطر"

يا بنت الفيكي مجنون

وإنتي فيِّي مجنوني

شو بتمنَّا حدِّك كون

ومطرَح ما كون تكوني

××××

قالتلي مُش عم بتطِّل

شو القصَه شو صاير فِيك

معوَّد من عنا ما تفِل

وما تسرِب تا يصيح الدِيك


قلتلا يا عَطِر الفِل

انتِ بقلبي صرتي شريك

ومن قلبي يا سِت الكل

ما بشيلك لو عدموني

××××

يا بنِت الفيكي مجنون

وانتي فيِّي مجنوني

شو بتمنَّا حدِّك كون

ومطرَح ما كون تكوني

××××

ببعُد عنِّك كيف وليش

مينيِّي الأجمَل منِّك

بيبقى بعتمي عالبقبيش

المتلي لو بعَّد عنِّك


بدِّي خَبرهُم معلَيش

لهودي البيضلو بظنِّك

عنِّك لو بيكونو  جيش

بقبِّرهُم   لو  منعوني

××××

يابنِت الفيكي مجنون

وانتِ فيِّي مجنوني

شو بتمنَّا حدِّك كون

ومطرَح ما كون تكوني

:::::::::::::::::::::::::::::::

Farah News