Farah News Online

  http://www.farah.net.au/


الشاعر جميل نقولا الحايك: "عَم ترهجي"

| 12.02,17. 04:39 AM |







"عَم ترهجي"

بمناسبة عيد العشاق


بقلم الشاعر جميل نقولا الحايك





مبارِح بحفلي سهرِت سَهره مُبهجي

وحَدِّي صبيي   بلون   نار   مأججي

من غيرتي  وحتى  ما تبّقَى  مُحرَجي

حَسَّستها   دخلِت    بعمِق   خوالجي



وحسيتها  من  بيت  عيلي   مغنجي

والأهِل    بينادولها   يا    بنفسجي

وحسَّيت ما بتمشي طريق معوعجي

متِل  الكإنها   بتاج   نعمي  متَوجي



لتفتِت عليي  وقال  شعرَك  حربجي

ومن سَهِم شعرَك  ما قدِر قلبي نجي

ورَح  خبّرَك  لولا  ما  كون مروجي

تاهَون  حدَّك   ضَل  لو  رَح  إنهجي



قلتلها  تا  تروّجي   خَيلي   سرجي

ومطرَح ما بتكوني بعيوني مسيَجي

ولا تفزعي  يطلَع   وراكي   بلطجي

بيروح  مِتِل  الزير  وبيرجَع  عجي



وقلتلها  السهره   بوجودِك    مُنتجي

لتفتِت عليي  بهون  بسمي  مسرَجي

وقالِت أنا رَح  روح  جيب  حوايجي

ومزيني  رَح  عدلَك   عْلا   هودَجي



قلتلها   لا    تتعبي    ولا     تنهجي

وبدون   ما   تتزيني   عَم    ترهجي

وكل شي أنا من  الرَب  حابِب  اطلبو

يا رَب  تعطيني  الصَبِر  حتى   تجي

"خواطر"

البنت  الإنت  حبيتها  ميِن قدها

من بيها الطلي  وذكى من جدها

وعا كتِر ما من إمها أخدِت جمال

إستحلى القمَر ينزل  يبوسا بخدها

××××

عيَّدت  حَدِّك  يوم  عيد   العاشقين

عيدالما قدرو طعوجو زنودو السنين

عيدك   ياسِت   الكل   بالنسبي   الي

بيفعَل  متل  فعِل  الخميري  بالعجين

××××

يا مُلتقى العشاق  ياعنبر   وطيب

يا شرشَف الغطى الحبيبي والحبيب

عا كتِر ما  جوَّك  حلو  صرنا   نقول

رَيتو شروق الشمِس يبقى من المغيب

××××

يا ريتِك دخلتي  بحياتي من زمان

كنِت الأمير وحَد عرشي صولجان

وكنا أنا  وانتي  بحنان   مسلطنين

والناس  عَم   يتعلمو  منا   الحنان

××××
يا رَيتنا من زمان كنا  مزوجين

وأولادنا بنات  وشباب  مشَكّلين

حتى   الولاد     يعيدو    أعيادنا

وعا طول  نبقى  بالولاد   معيدين

:::::::::::::::::::::::::::::::::::

Farah News