Farah News Online

  http://www.farah.net.au/


الشاعر جميل نقولا الحايك: "هذا الكعِك من ذاك العجين"

| 06.01,17. 01:53 PM |




"هذا الكعِك من ذاك العجين"

بقلم الشاعر جميل نقولا الحايك





اللي قال هذا الكعِك من ذاك العجين

ما عاد  لازِم  يسأل  منين  الطحين

عندَك  طحين    العاجنينو    جيّدين

وعندَك  طحين   العاجنينو  عاطلين



وبعاطِل   وجّيِّد    اذا   رايح   تزين

لا تفوِّت  الصاقط  عا بيت  الناجحين

عندَك   عجين    مخمّرينو    فاشلين

وعندَك  عجين   مخمرينو  مدوزنين



وخبزاتنا   الطلعو   بيشهّو   مأمرين

مُش  متِل   يللي   معجَّناتو   معجَّنين

من  هون  فيني  قول  لِلشعِر  الحزين

سَلِّم   جزورَك    لِلِّي   خلقو  مُلهَمين



والمُلّهمين      البشّعِر        متفوقين

مُش متِل يللي  نزاع  عنهُم  صاقطين

واللي   عتادو    بالفشَل    يتخضرَمو

مُش رَح يصيرو  بالنجاح  مخضرمين

"خواطر"

في  ناس   فاتو   عالشعِر  يتعكَّزو

وبجنازتو   في   كتار  عَم   يتلزَّزو

وبيت الشعِر متلو متِل قرص العجين

بيرفُض  يهللو  الما  بيعرِف  يخبزو

××××

بالقمِح   تعبو    العالبيادِر    جامعين

و تعبو اللي خللو القمِح يتحول طحين

وبعِد  التعَب  بعتو  العجين   لمخّبزَك

إنْ  ما  كنِت  خَبّاز  لا  تمِسّ  العجين

:::::::::::::::::::::::::::::::::::::

Farah News