Farah News Online

  http://www.farah.net.au/


"الشاعر جميل نقولا الحايك" روباعيات منوعه رقم 6

| 16.10,16. 10:33 PM |






"روباعيات منوعه رقم 6"


بقلم الشاعر جميل نقولا الحايك




رَح  خبّرَك  يا معتبِر حالَك   ذَكي


شواللي بيفرُق مسلكَك عن مسلَكي

بكتِر الحكي  انتَ  عَم  تعمِّر  بيوت

وبو جورج عمَّر بالفعِل مُش بالحَكي


××××


يا شَب  يَلْ   بَعدَك بِعُمِر  الولدني

ليشَك معبَق  شو اللي صايِر بالدني

افراح انبِسط عيش وعابُكرا  في هموم

كل  ساعِت   هَم   أطوَل   من   سِني


××××


يا أرز لبنان الإلَك  فيي نصيب

انتَ حبيبي  بعِد  يسوع  الحَبيب

من قلوبنا مافي ولا قويي تقلعَك

ومسَيجك يسوعنا بضهِر القضيب


××××


شفِت أرزي  طالعَه  بهونيك  شير

قلتلها كبيري عاهَل الجزِع الصغير

قالِت محَللي حِط  شجرَه  من بولاد

ورجاع   خبِر  بعد  ليلة   زمهرير


××××


شفِت   الجبَل  عريان قلتلو  ستحي

ومن غيرتي عطيتو تا يلبِس مشلحي

قللي  إذا  لبِس  الدني   بتلبِس  عليك

ما  فيك  ليلة   تلِج   توقَف  مطرَحي


××××


صنين  نحنا عارفينَك  إنِت   مين

وياما بهضابك عالحِجال مركّزين

المغرور  لو جرَّب عرينَك  يقحمو

بيكون جايي يموت عا باب العَرين


××××


قلتلها شو رأيِك  بقرِش الحَلال

قالِت  يا نيال  اللي  عبَّا  جيبتو

من ميل قادِر يعرِف يربي عيال

ومن ميل  تاني بيكرمولو شيبتو



:::::::::::::::::::::::::::::::::

Farah News