Farah News Online

  http://www.farah.net.au/


"الشاعِر جميل نقولا الحايك: "زلزالي

| 12.10,16. 09:01 PM |







"زلزالي"


بقلم الشاعِر جميل نقولا الحايك




مُش عَم بصَدِّق ساكني بالي


وعَم تسأليني كيف أحوالي

صِرِت بغيابِك مُش كتير منيح

وصار خلّقي انطلِع زلزالي



بنام الصبح لما الديوك تصيح

وبوعى تاحيّي الجاب مرسالي

وصدقيني كيف ما عَم زيح

عم شوف طيّفِك واقِف قبالي



أوقات عَم شوفِك عالمراجيح

وأوقات حَد البيت بالدالي

وأوقات عَم بتشَعّلي مصابيح

تا تنوّري عرزالنا الغالي



وبالوقِت ذاتو برَتِّل  تسابيح

وبطلُب تا  يسمَع  رَبنا  العالي

حتى أبوكي يصير وضعو منيح

ومجبورة الخاطر تعودي بخير

وتطمني عن حالِك بحالي



"خواطر"



من بعِد ما درسِت القضيي الصايبي

عايشتها تا  تأكَّدِت   مُش   خايبي

وتإكَدِت  عمرو  مابيشوف  النجاح

بيت اللي  سِت   البيت  عنو غايبي

××××

بعرِف ياسِت البيت عشتي راضيي

وبعرِف لِغير الرَب  مَنِّك  فاضيي

وبعرِف غياب الأب يمّكِن ينحَمَل

لكن غياب الإم   ضربي  قاضيي

:::::::::::::::::::::::::::::::::


Farah News