دمعة الشاعر جورج بو أنطون رئيس نقابة شعراء الزجل في لبنانفي الحفل التأبيني للفنان الراحل وديع الصافي

| 13.11,13. 03:00 PM |

 

دمعة الشاعر جورج بو أنطون


رئيس نقابة شعراء الزجل في لبنان

في الحفل التأبيني للفنان الراحل وديع الصافي

 

 

 

القاها الشاعر حنا الشالوحي

 

 

يا موت صرنا درب نهجك عارفين

وصرنا على موعد وصولَك عايشين

وفي ناس عا هالدرب ناس بيسْبَقو

عا جنّة الربّ وعا أرض الخالْدين

وفينا نقول من كلّ يلّلي تحقَّقو

عن درب فعل التجربِه وفعل اليقين:

في ناس بيموتو عندما بيخلقو

وفي ناس بيموتو وبيضلّو عايشين.

 

يا موت نحنا منعرفك جسر العبور

بتنْقل العالم من دْيار عْلى ديار

وبالرغم ما جروحَك عم تْبَكِّي الصخور

منعرف وجودَك حقّ وجروحَك قَرار

لكن اسمحلي اليوم من بين السطور

قلّك: عا أرضَك آخد جبين الوَقار

آخد الحلم اللي عَطى الإبداع نور

آخد الكلمِه العطيتْ المبدا شِعار

آخد البسمِه العطيتْ النسمِه شعور

وين ما زرعها الربّ رح تبقى مزار.

 

يا قلب صافي يا نغم شلاّل

يا جْبين حاكى المجد بالطلِّه

يا صوت ساحِر هزّ أعلى جْبال

يا سنديانِه مزيَّنِه التلِّه

وقِفنا قبال معلِّم الأجيال

حتَّى نصلِّي وصوتنا نعلِّي

لقينا الأبانا الصاغْها الموّال

هيِّي على ترابو عم تصلِّي.

   

قطعة سما نزلتْ على بْوابَك

لحّنتها بأسلوبَك الفنِّي

ولبّستْها مْن حْياكة تْيابَك

وأعطيتها الإبداع والرنِّه

ولمّا تركتْ بِها الدني كتابَك

وطْلعتْ حتَّى تسكن الجَنِّه

زِعْلتْ نجوم الليل عا غْيابَك

وطلّ الصباح وما سمع صوتَك

ما عاد خَلَّى البلبل يْغنِّي.

 

يا صوت عم يهدُر بها الوديان

يا قلب من تلج الجبَل أطهر

يا اسم بحْروفو اغتنى لبنان

يا عَين عالإلهام عم تسهَر

نطرْنا تا متلك ينوَجَد فنَّان

بقلوب كلّ العالـَم مْصوَّر

تاري إنتْ من معجن الإيمان

طلعتْ العجينِه الما بتتكرَّر.

 

الأستاذ وديع الكان أسطورَه

وأرزِه بعلَم لبنان محفورَه

بعدو ما بين الناس قلب وروح

ودْراج بيتو ملعب نسورا

بعدو لحن مِنُّو العطر بيفوح

بعدو نغم شلاّل ونهورا

ولو راح من هالكون ما بيروح

بِكلّ قلب وفي إلو تاريخ

وبْكلّ عين وفي إلو صوره.

 



(Votes: 0)